حسن علي - وبعد ان انهي حديثهُ معها | Hassan ALi - W B3d An Anhy 7dythh M3ha

الكلمات

وبعد ان انهي حديثه معها 

وبعد ما خلص كلامه معاها 

فضل ماشي من غير ما يعرف رايح فين 

فضل ماشي زي المغيب او المسحور 

زي ما يكون طفل تايه من اهله وخايف ميعرفوش يلاقوه 

ماشي سرحان ف اليفط.. المحلات.. ارقام العربيات 

سرحان ف تفاصيل عمره ف يوم ما ركز فيها 

حفظ تفاصيل مكان من كتر سرحانه مش عارف هو ايه 

حفظ وكانه طفل بيراجع قبل ساعة من الامتحان

وفجأة.. 

وفجأة فاق ع عربية لو كان زود سنه ف سرحانه 

كانت هتريحه من المه الخاص 

وقف ف جمب مندهش وكانه فاق من سحرها وسحر الم كلامها 

وسؤال واحد ع لسانة انا جيت هنا ازاي.. انا ايه جابني هنا 

واندهاشه زاد اكتر واكتر بعد ما اكتشف انه  رايح لاكتر مكان كانوا بيمشوا فيه سوا 

لما اكتشف انه كان بيهرب منها ليها 

ومن غير تفكير رجع ادراجه.. رجع من مكان كان بيجمعهم  ببعض زمان 

وف طريقة وقف قدام محل.. سوبر ماركت 

دخل ليه وهو مش عارف عايز ايه.. لكن ف الحقيقة هو داخل يدور ع اي حاجه مساعده تنسيه 

وف ثواني لقي نفسه قدام البياع.." اقدر اساعدك بايه".. مفيش حاجه ف دماغة لكن من كسفته فضل يسال ع كل حاجه مش موجودة بيسال ع حاجات هو عارف انه مش هيلاقيها 

واخيراً قرر يطلب اكتر حاجه مسكره.. يمكن تقدر تمحي مرارة كلامها ليه 

تمحي قسوتها اللي ف لحظة تخليه يطلب حاجه غير اللي نازل من بيته ليها 

"هو ف الاصل كان زهقان طهقان من كتر مشاكلة قال ينزل يشرب قهوته المظبوطة من احلي مكان داقها فيه.. مهموش المسافة.. مهموش ان ممكن القهوة متكنش زي اول مرة شربها هناك.. كل اللي فكر فيه طعمها االي هيخفف عنه شعوره وخنقته، 

وف وسط الطريق جت مكالمة منها.. ف الاول كان مكرر ميردش عشان عارف احتمالية افساد تلك اللحظة الخاصة.. ولكن رد.. وبدأت بداية النهاية منذ بداية حديثها"

نرجع للاصل 

فضل ماشي وف ايده اكتر حاجه هي حباها مش هو حاببها.. وف تلك اللحظة تاكد ان كل حاجه بيعملها بتاخذه ليها 

لكن قرر

قرر يرجع تاني لبيته يرجع تاني لحارته  يرجع تاني لنفسه.. لهمسه.. لفرحته.. لطبيعته.. لقهوته البسيطة اللي تحت بيته.. قرر يشرب فيها فنجان يدعي ها قد عدت لنفسي الان

القصيدة صوت

القصيدة فيديو